ყველაფერი მოხალისეობის შესახებ (ორგანიზაციებისთვის)

კურსი “ყველაფერი მოხალისეობის შესახებ” შექმნილია მოხალისეობით დაინტერესებული ადამიანებისთვის. კურსი იძლევა საშუალებას მოემზადოთ მოხალისეობრივი საქმიანობის დასაწყებად ან მის განსავითარებლად. კურსის ფარგლებში თქვენ გაეცნობით მოხალისეობასთან დაკავშირებულ ისეთ საკითხებს, როგორიცაა მოხალისეობის განმარტება და სახეობები, მოხალისეობასთან დაკავშირებული ღირებულებები და თანამედროვე ეთიკური ნორმები, მოხალისეობისთვის საჭირო ცოდნა და უნარები, გაიგებთ თუ რა უფლებები აქვს მოხალისეს და მოხალისეობის რა შესაძლებლობები არსებობს, როგორც საქართველოში ისე მის გარეთ.  კურსი იყოფა ორ ნაწილად. პირველი ნაწილი შექმნილია მოხალისეობით დაინტერესებული ნებისმიერი ადამიანისთვის თუ ორგანიზაციისთვის, მიუხედავად წინარე გამოცდილებისა თუ ცოდნისა. კურსის  პირველი ნაწილის გავლის შემდეგ თქვენ შეძლებთ:

• მოხალისეობრივი საქმიანობის ამოცნობას და მისი სახეობების გარჩევას;
• საკუთარი მოხალისეობრივი აქტივობების დაგეგმვას, როგროც დამოუკიდებლად, ისე ორგანიზაციების მხარდაჭერით.

მეორე ნაწილი არის განკუთვნილი სამოქალაქო საზოგადოების და კომერციული ორგანიზაციებისთვის, რომლებიც დაინტერესებულები არიან მოხალისეობის პროგრამების დანერგვით. ორგანიზაციებისთვის განკუთვნილი ნაწილის გავლის შემდეგ, თქვენ შეძლებთ:

• განსაზღვროთ ორგანიზაციის შესაძლებლობები მოხალისეობრივი პროგრამების დასანერგად;
• განსაზღვროთ ორგანიზაციის საჭიროებები მოხალისეობის მიმართულებით და დაგეგმოთ შესაბამისი ნაბიჯები.

კურსის სასწავლო მასალა შეიცავს თემატურ ლექციებს, პრაქტიკულ დავალებებს, გამოკითხვებს, საკითხავ ლიტერატურას და სასარგებლო წყაროებს. კურსის წარმატებით გასავლელად, მნიშვნელოვანია არა მხოლოდ ვიდეო-ლექციების ყურება და ყურადღებით მოსმენა, არამედ პრაქტიკული დავალებების შესრულება და ინტერაქცია კურსის სხვა მსმენელებთან. 

კურსის მასალა ორგანიზებულია ისეთი თანმიმდევრობით, რომ ყოველი შემდგომი თემა ერთმანეთთან კავშირშია. შესაბამისად,  მნიშვნელოვანია ყველა სექციის თანმიმდევრობით გავლა.

კურსის შექმნაში  ჩართული იყვნენ მოხალისეობის გამოცდილების მქონე ადამიანები და საკითხის მკვლევარები.

აღნიშნული კურსი მხარდაჭერილია პროექტის „სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისთვის“ (STAR) ფარგლებში, რომელიც ხორციელდება ევროკავშირის (EU) და კონრად ადენაუერის ფონდის (KAS) ფინანსური მხარდაჭერით.

პროექტის პარტნიორები არიან:

• საქართველოს სტრატეგიული კვლევებისა და განვითარების ცენტრი (CSRDG)
• სამოქალაქო საზოგადოების ინსტიტუტი (CSI)
• კონსულტაციისა და ტრენინგის ცენტრი (CTC)
• ეკონომიკური განვითარების და მხარდაჭერის ცენტრი (EDEC)
• ევროპული პოლიტიკის ინსტიტუტი (IEP)

პროექტის მიზანია საქართველოში სამოქალაქო საზოგადოების ორგანიზაციების გაძლიერება, მათი მდგრადობის, გამჭვირვალობისა და ანგარიშვალდებულების ამაღლება. პროექტის ფარგლებში განსაკუთრებული ყურადღება ეთმობა მოხალისეობის განვითარებას, რაც მოიცავს ტრენინგებსა და შესაძლებლობების გაძლიერებას.

ვიმედოვნებთ, რომ ეს კურსი დაგეხმარებათ ახალი ინფორმაციის მიღებაში და მოტივაციას მოგცემთ, კიდევ უფრო აქტიურად ჩაერთოთ მოხალისეობაში.

გისურვებთ წარმატებებს!